د هرات والي د دغه ولایت له ښاروال سره وکتل د هرات والي، شیخ مولانا نوراحمد اسلامجار، د دغه ولایت له ښاروال، الحاج مولوي حمدالله نعماني سره لیدنه او خبرې وکړې.
په دې لیدنه کې د هرات والي د دغه ښار د نوي ماسټرپلان د ژر تر ژره پلي کېدو پر چټکتیا ټینګار وکړ او د یاد پلان پلي کېدل یې د منظم ښاري پراختیا، د زیربناوو د ښه والي او د ښار د اقتصادي ودې لپاره مهم ګام وباله.
په همدې حال کې، د هرات ښاروال، الحاج مولوي حمدالله نعماني، د ولایت والي ته د ښه راغلاست ترڅنګ ډاډ ورکړ، چې د هرات ښاروالۍ به د نوي ماسټرپلان د پلي کېدو او د هغه د پراختیايي موخو د تحقق لپاره هڅې وکړي.
د هرات ښار نوی ماسټرپلان د ښاري پراختیا لپاره پراخ او راتلونکيمحور لیدلوری لري، چې شاوخوا ۸۰۰ زره جریبه ساحه په بر کې نیسي.
په دغه پلان کې د دوو نویو ښاري ناحیو، یعنې ۱۶مې او ۱۷مې ناحیې، جوړېدل په پام کې نیول شوي، چې د ښار د منظم پراخوالي او د ښاري خدمتونو د غوره وېش زمینه به برابره کړي.
همدارنګه، په نوي ماسټرپلان کې د نوي صنعتي ښارګوټي لپاره د مناسبې او پراخې ساحې ځانګړي کول، په نوي ښار کې د سړکونو د شبکې پراختیا، د لوجستیکي پارک جوړول او د زیربناوو او پراختیا اړوند نورو برخو ته پاملرنه شوې ده.
د دغه ماسټرپلان پلي کېدل کولای شي د هرات ښار په متوازنه پراختیا، د ښاري زیربناوو په ښه والي، د تګ راتګ په اسانتیا، د صنعتي او سوداګریزو فعالیتونو په ملاتړ او د پانګونې او اقتصادي ودې لپاره د مناسبو شرایطو په برابرولو کې مهم رول ولوبوي.
د هرات ښاروالۍ ژمنه دی، چې د ولایت مقام او نورو اړوندو ادارو سره په همغږۍ به د هرات ښار د معیاري، منظمې او دوامدارې پراختیا لپاره اغېزمن ګامونه پورته کړي.
