د هرات ښاروالۍ د پراختیايي بودجې څخه د ۴.۵ میلیونه افغانیو په لګښت د فرهنګ پارک شمالي لوري د سرپوښلي کانال د جوړولو پروژه پرانیستل شوه.
د هرات ښار د پنځمې ناحیې اړوند، د فرهنګ پارک شمالي لوري ته د سړک له پليلارې سره نښتی د سرپوښلي کانال د جوړولو پروژې چارې، چې ۳۵۰ متره اوږدوالی او ۱.۲ متره پلنوالی لري، د هرات ښاروالۍ له پراختیايي بودجې څخه د ۴.۵ میلیونه افغانیو په لګښت په رسمي ډول پرانیستل شوې او چارې یې پیل شوې.
د یادې پروژې د پرانیستې په مراسمو کې د هرات ښاروالۍ د فني او مسلکي رئیس انجینر محمد ایوب سیفالجهاد، د ښاروالۍ د نظارت او ارزونې آمر انجینر محمدیار شهاب، د پنځمې ناحیې آمر مولوي محمد نسیم شهیدزاده، د سیمې مشرانو او د ګذر وکیلانو، د سیمې د انکشافي شوراګانو رئیسانو او د ښاروالۍ د اړوندو برخو یو شمېر مسئولینو ګډون کړی و.
د هرات ښاروالۍ مسئولین د دې پروژې پلي کول د اوبو د لارو د وضعیت د ښه والي، د سطحي اوبو د غوره مدیریت او په دې برخه کې د شته ستونزو د حل په موخه مهم بولي او د چارو پر مهال د کیفیت او فني معیارونو پر رعایت ټینګار کوي.
په همدې حال کې، د ښار د پنځمې ناحیې اوسېدونکو د دې پروژې د چارو د پیل له امله خوښي څرګنده کړې او د دې پروژې پلي کول یې د چاپېریالي وضعیت د ښه والي او د ښاریانو د تګراتګ د اسانتیا په برخه کې اغېزمن ګام بللی دی.
له بلې خوا، د «مدبران» ساختماني شرکت مسئولین د پروژې د چارو د کیفیت په اړه ډاډ ورکوي او وایي، چې دغه پروژه به د فني او تخنیکي معیارونو له مخې، په ټاکل شوې موده کې بشپړه شي.
د یادونې وړ ده، چې ټاکل شوې دغه پروژه د درېیو تقویمي میاشتو څخه په زیاته موده کې بشپړه او ګټې اخیستنې ته وسپارل شي.
