د هرات ښاروالۍ د لومړۍ ناحیې اړوند د خواجه مرادبخش شمال لوري کانال او د جي ۶ ګذر د معلم ۳ کانال جوړولو پروژه څه باندې ۴.۵ میلیونه افغانیو په لګښت د چارو پیل.
د هرات ښار د لومړۍ ناحیې اړوند د خواجه مرادبخش شمال لوري (آخر جوی) کانال او د جي ۶ ګذر د معلم ۳ کانال جوړولو پروژې، چې ټولیز اوږدوالی یې ۵۲۵ متره دی، د هرات ښاروالۍ د پرمختیایي بودجې څخه د ۴ میلیونه او ۵۰۰ زره او ۲۲۰ افغانیو په لګښت، د ښاري او سکتوري خدمتونو آمریت وارسي کونکی انجنیر محمدیار شهاب، د ښاروالۍ د څارنې او ارزونې آمریت وارسی کونکی انجنیر سباوون کاکړ، د سیمې مشرانو، د ګذر وکیلانو، د پرمختیایي شوراګانو رئیسانو او یو شمېر سیمهییزو اوسېدونکو په حضور کې، د «آسمان سا» ساختماني شرکت له لوري په رسمي توګه پرانیستل شوې او عملي کار یې پیل شو.
د پروژې د قراردادي شرکت مسئولینو ډاډ ورکړ چې دغه پروژه به د تخنیکي معیارونو سره سم، په غوره کیفیت او ټاکلي وخت کې بشپړه او ګټې اخیستنې ته وسپارل شي.
په همدې حال کې، د لومړۍ ناحیې د جي ۶ ګذر یو شمېر اوسېدونکو د دې پروژې له پیل څخه هرکلی وکړ او دا یې د شته ستونزو د حل، د ښاري چاپېریال د وضعیت د ښه والي او د ښاریانو د هوساینې د زیاتوالي لپاره یو اغېزناک ګام وباله.همدارنګه د ښار په بېلابېلو ناحیو کې د پرمختیایي پروژو د پلي کولو له امله د هرات ښاروالۍ له پاملرنې او هڅو څخه مننه وکړه.
د یادونې وړ ده چې ټاکل شوې دغه پروژه د شاوخوا څلورو تقویمي میاشتو په موده کې بشپړه او ګټې اخیستنې ته وسپارل شي.
