د هرات ولایت نوی ښاروال معرفي او رسماً يې په دنده پیل وکړ
د عالیقدر امیرالمؤمنین شیخ مولوي هبت الله آخندزاده حفظه الله د حکم پر بنسټ، د هرات نوی ښاروال الحاج ملا نعمت الله حسن صاحب د هرات ولایت والي شیخ الحدیث مولانا نوراحمد اسلام جار له لوري نن رسماً معرفي او په دنده يې پیل وکړ.
د هرات ولایت والي محترم مولانا اسلام جار د هرات نوي ښاروال ته د هرکلي او ښه راغلاست ویلو سربېره، د هرات د مخکنیو ښاروالانو په ځانګړي توګه الحاج ملا عبدالرازق راشد صاحب رغنده کړنې وستایلې او څرګنده يې کړه، چې ښاغلي راشد صاحب د هرات ښار د پرمختیا او پراختیا په چاره کې له هيڅ راز هڅو سپما ونکړه.
د هرات والي شیخ الحدیث مولانا اسلام جار د خپلې وینا په دوام څرګنده کړه، چې د تېرو دوو کلونو په بهیر کې د هرات ښاروالۍ فعالیتونه او لاسته راوړنې د پام وړ او درنې دي او د هیوادوال خاص ډول هرات ښاریان يې خوشحاله کړي.
په ورته مهال کې د هرات ښاروالۍ ادارې مرستیال الحاج مولوي جلال الدین حقدوست او د ښاري حکومتولۍ رئیس استاد محمد جاوید مایار د خپلو ویناوو پرمهال د هرات نوي ښاروال او مل پلاوي ته د هرکلي او ښه راغلاست ویلو ترڅنګ په ورسپارل شویو چارو کې د بریا هیله وکړه.
دوی دغه راز د هرات مخکني ښاروال حاجي راشد صاحب له دوامداره هڅو او رغنده کړنو مننه وکړه او یو ځل بیايې د هرات نوي ښاروال څخه خپل هراړخیز ملاتړ څرګند او همکارۍ اعلان وکړ.
په عین حال کې د هرات نوي ښاروال الحاج ملا نعمت الله حسن صاحب په خپلې وینا کې څرګنده کړه، چې تغیر او بدلون د اسلامي امارت په نظام کې اړین اصل دی او ټول مسؤلان او کارکوونکي باید خلکو ته د خدمت رسونې په چاره کې هڅانده وسي.
هرات ښاروال دغه راز د هرات ښاروالۍ مسؤلانو او کارکوونکو ترمنځ پر لازیاتې همږغۍ ټېنګار وکړ او تري وغوښتل، چې په ورسپارل شوو دندو کې ریښتني هڅې وکړي.
دویلو ده، چې د هرات نوی ښاروال له دې وړاندې د کندهار ښاروال په توګه هم دنده ترسره کړي وه.
